నా దారి




నేను దారి తప్పి నడుస్తున్నానా ?



నిజమా ?
అయితే నేను చేరాల్సింది ఎక్కడికి ?
చేరాల్సింది ఎక్కడికో తెలిస్తేనే కదా దారి తప్పానా లేదా తెలిసేది ?

ఈ దారి వద్దన్నా నడిపిస్తోనే ఉంది ! ఎంతకీ ఆగని దారిలా ఉంది !

కానీ ప్రతి అడుగు తప్పటడుగులానే ఉంది !
ఎక్కడికో వెళ్తున్నట్టే ఉంది , తప్పుతప్పుగా !

చేరాల్సిన చోటేదో తెలియక
నడక సాగుతోనే ఉంది !

నా కోసం

నేను ఏది చేసినా అంతా నీ కోసమనే  నువ్వనుకుంటావు  !
కానీ ,
నిన్ను కాదనుకున్నా, నా కోసమే  
నిన్ను కావాలనుకున్నా, నా కోసమే !
నిన్ను కోపగించుకున్నా,  నా కోసమే  
నిన్ను కవ్వించినా, నా కోసమే !

అంతా నా కోసమే, ప్రియా
నన్ను క్షమించు
నీకోసం ఏది లేదు  నా దగ్గర ! 
ప్రేమా , గీమా , ఏదీ లేదు, అంతా నేనే ఉన్నాను, నాలో.  

కప్పేసేయ్

ఎందుకీ వెదుకులాట ?

ఉన్నాయ్ కదా దుప్పట్లు

మంచితనం , మర్యాదలు, తెలివి తేటలు

కప్పేసేయ్ !

నీ స్వార్థపు వికృతపు ముఖాన్ని

నిండుగా , పూర్తిగా

కప్పేసేయ్ !

నీ ముఖం , నీ అసలు ముఖం

నీ పక్కవాడికి, నీకూ

కనిపెంచేలోగా

కప్పేసేయ్ !

అయినా ఎవరు చూడలేదులే , ఎందుకీ గోల ?

దుప్పట్లో, చీకట్లో,

భయంగా, హాయిగా,

ఉండిపో !

మనం

మనం ద్వేషించే గుణాలన్నీ మనలోనే ఉంటే

ఇంకేం చేయగలం ?

మనం విమర్శించే విషయాలన్నీ మనలోనే ఉంటే

ఇంకేం మాట్లాడగలం ?

మనం సొంతమనుకున్న విషయాలన్నీ మనం దొంగలించినవని తెలిస్తే ,

మరెవర్ని శిక్షించగలం ?

మనం పాటించనివే మరొకరికి ప్రవచిస్తున్నామని తెలిస్తే ,

మరేం చెప్పగలం ?

మనమేదో చేయాలని బయటకు వెళితే , ముందు మారాల్సింది మనమేనని తెలిస్తే,

మరెక్కడికి పొగలం ?

ఓ మూలన మౌనంగా కుర్చోనడం తప్ప !

మైదానం

నేను నా గీత దాటి నీ మైదానంలోకి

వచ్చానని సంబరపడ్డాను !

కానీ నువ్వన్నావ్ !

"నీ గీతఐతే దాటావేమో ! కానీ నా మైదానంలో నువ్వింకా అడుగుపెట్టలేదు " .

నిన్ను చేరాలనే నా గీత దాటినవాణ్ని.

తిరిగి పోలేను.

ఎంతకీ కానరాని నీ గీతని దాటడానికి ,

నిన్ను చేరడానికి,

నేనంతటా వెతుకుతున్నాను.

ప్రతీ మైదానంలో అడుగుపెడుతున్నాను.

కానీ, నీ గీతేమిటో నాకంతుబట్టడంలేదు.

అలసి పోయి కూలబడ్డాను ఇలా ఈ మైదానాల్లో,

నువ్వు నీ గీత దాటి నన్ను చేరుతావని ఎదురుచూస్తూ !